Та бүхэн ШУА-ийн МАТЕМАТИК, ТООН ТЕХНОЛОГИЙН ХҮРЭЭЛЭНгийн цахим хуудсанд тавтай морилно уу.
Дэлхий дахины шинжлэх
ухааны өнөөгийн хөгжлийн гол чиг хандлага нь математикийн шинжлэх ухаан болон компьютерийн
ухаан, мэдээллийн технологийн ололт амжилтаар өөр хоорондоо гагнагдан хөгжиж
байгаа явдал юм. Улс орон бүр “Аж үйлдвэрийн IV хувьсгал”-д бэлтгэн нөөц
бололцоогоо чадавхижуулж, технологийн салбартаа гол анхаарлаа хандуулж байгаа ба энэхүү
технологийн хувьсгал улс орны бүхий л салбаруудыг өргөнөөр хамарч ухаалаг
системүүдийг нэвтрүүлэх, автоматжуулах, их хэмжээний өгөгдлийг бүрдүүлэх, боловсруулах, ашиглахад тулгуурлан өрнөж байгаа нь өмнөх аж үйлдвэрийн
хувьсгалуудаас онцлогтой юм.
Үүний нэгэн адилаар
Монгол улс тус хүрээлэнг салбартаа манлайлан математик,
компьютерийн ухаан, автоматжуулалтын чиглэлээр судалгаа
шинжилгээний ажил хийгээд зогсохгүй улс орондоо инновацийн бүтээгдэхүүн бий
болгох, судалгаа хөгжүүлэлтийн ажлыг амьдралд нэвтрүүлэх зорилгоор байгуулж
байгаа ба бидний Математикийн болон Информатикийн хүрээлэн байхдаа салбартаа
судалгаа шинжилгээний ажлуудаараа манлайлан оролцдог, гадаад хамтын ажиллагаа
хөгжсөн, инноваци болон суурь судалгааны чамгүй
туршлагатай байсан зэрэг нь одоогийн энэ хүрээлэнгийн суурь түшиц, дэмжлэг
болох нь дамжиггүй.
Монгол улсын ШУА-ийн,
Математик, тоон технологийн хүрээлэнтэй математик, мэдээллийн технологийн
чиглэлээр хамтран ажиллаж төсөл хөтөлбөр хэрэгжүүлэх, ном бүтээл туурвих, эрдэм
судлалын хамтарсан харилцааг өрнүүлэх болон улс орны өмнө тулгамдсан асуудлыг
шийдвэрлэхэд төрийн, хувийн хэвшлийн,
олон улсын байгууллагуудтай хамтран ажиллахад бид бүхэн нээлттэй байна.
Шинжлэх ухааны
салбарт ажилладаг нийт хамтран зүтгэгчид болон тус салбарыг Монгол улсад
хөгжүүлэхэд үнэтэй хувь нэмэр оруулсан ахмад эрдэмтэд болон үе үеийн эрдэмтэд,
залуу судлаачид та бүхэндээ мэндчилгээ дэвшүүлэж цаашдын эрдэм судалгааны ажилд
нь өндөр амжилт хүсье. Мөн тус салбарын
үр шимийг хүртэж яваа хүн бүрийн амьдралд нь аз жаргал, сайн сайхан бүхнийг
хүсэн ерөөе.
Энэхүү цахим хуудас
нь та бидний мэдлэг, мэдээлэлийг солилцох хамтын ажиллагааны талбар болно
гэдэгт бид бүрэн итгэлтэй байна.
ШУА-ийн, Математик, тоон технологийн хүрээлэнгийн захирал
Д. УУГАНБААТАР