Agentic AI гэдэг нь хиймэл оюун зөвхөн асуултад хариулах бус, өөрөө зорилгоо ойлгож, төлөвлөгөө гаргаж, хэрэгтэй багаж хэрэгсэл, үйлчилгээтэй холбогдон даалгаврыг алхам алхмаар гүйцэтгэж чаддаг “ажиллаж сурсан” агентуудыг хэлдэг. Ийм агентууд хүний өгсөн ерөнхий зорилгыг (жишээ нь: “манай компанийн 2024 оны санхүүгийн тайланд дүн шинжилгээ хийгээд, гол эрсдэлийн жагсаалт гарга”) хүлээж аваад эхлээд шаардлагатай мэдээллийг цуглуулж, дараа нь ямар алхмууд хийхээ өөрөө төлөвлөж, хэрэгтэй бол код бичиж ажиллуулан, өгөгдлийн сантай холбогдож, вебээс нэмэлт эх сурвалж хайж, дотоод санах ойдоо өмнөх туршлагаа хадгалсаар төгсгөлд нь хүний уншихад бэлэн тайлан, зөвлөмж болгон буцааж өгөх чадвартай. Энэ бүх үйл явцын туршид хүн алхам бүрийг зааж өгөх албагүй, харин зорилго, хязгаар, дагаж мөрдөх үндсэн дүрэм (бодлого)-ийг тогтоож өгөөд, үлдсэнийг нь агент өөрөө шийдэж гүйцэтгэдэг тул ийм төрлийн системийг “agentic” буюу үйлдэл хийх чадвартай, харьцангуй бие даасан шинжтэй хиймэл оюун гэж нэрлэж байна.
Ийм системүүд улам хүчирхэг болох тусам ирээдүйн ажлын байранд гарах өөрчлөлт улам тод харагдана. Давтагддаг, дүрэм нь тодорхой, олон жижиг алхмаар гүйцэтгэдэг ажил (тайлан, мэдээлэл нэгтгэх, анхан шатны хууль, санхүүгийн баримт шалгах, захиалга, нэхэмжлэл боловсруулах, энгийн код засварлах, тест бичих, хэрэглэгчийн энгийн асуултад хариулах зэрэг)-ыг agentic төрлийн хиймэл оюун ихэнхийг нь автоматжуулж чадна. Харин хүн илүүтэйгээр “зорилгоо тодорхойлох, шаардлага гаргах, үр дүнг хянах, онцгой тохиолдлыг шийдэх, бүтээлч шийдэл олох” ажилд төвлөрч, нэг хүн олон AI агенттай баг удирдан ажиллах, өөрөөр хэлбэл ажлынхаа ихэнхийг төлөвлөлт, шийдвэр гаргалт, шалгалтад зарцуулах хэрэгцээ нэмэгдэнэ. Жишээ нь ирээдүйн бизнесийн шинжээч гэдэг нь Excel дээр бүхнийг гараараа хийдэг хүн гэхээсээ илүү мэдээлэл цуглуулдаг, дата цэвэрлэдэг, модел ажиллуулдаг, тайлан бичдэг хэд хэдэн AI агентын гаргасан үр дүнг нэгтгээд стратегийн зөвлөмж болгон хувиргадаг удирдаач шиг үүрэгтэй мэргэжил болно. Программист ч мөн жижиг, давтагддаг код бичихээсээ илүү системийн архитектур төлөвлөх, шаардлага тодорхойлох, аюулгүй байдал, кодын чанар, стандарт тогтоох талд төвлөрч, харин AI агентууд автомат тест бичих, үндсэн загвар кодуудыг үүсгэх, өгөгдлийн бааз шилжүүлэх, системүүдийг хооронд нь холбох зэрэг ажилд түлхүү оролцох магадлалтай. Үүнтэй зэрэгцээд хиймэл оюуны аюулгүй байдлын инженер, хиймэл оюуны бодлого боловсруулагч, хиймэл оюуны системийг хянаж шалгагч зэрэг хууль, ёс зүй, аюулгүй байдалтай холбоотой шинэ мэргэжлүүдийн хэрэгцээ өсөж, ирээдүйн олон ажил “хүн + өөрийн AI агентуудтайгаа хамтарсан баг” хэлбэртэй байх нь өнөөгийн чиг хандлагаас тодорхой харагдаж байна.
Эх сурвалж https://neuron.expert/news/agentic-ais-impact-on-global-workforce-dynamics https://www.emagia.com/blog
Мэдээ бэлтгэсэн: ЭША Ч.Өлзий-Даваа